疯传美贸易代表是戴笠后代 与北京有血海深仇？

华裔律师戴琦被拜登提名出任美国贸易代表，内地五毛立即做嘢，传播一篇短文，话戴琦系战时蒋委员长重臣、军事情报头头戴笠之曾孙女。此文一出，周围都讲，连七十岁嘅宾架K都转发畀左丁山、蓝丝友又传过嚟。讲到戴琦背景复杂，与中共有血海深仇，佢阿爷就系畀中共于1951年枪毙嘅。

左丁山见到系简体字短讯，心有怀疑，因内地微信微博有太多假嘢混淆视听，信唔过嘅，只系用嚟呃海外大陆人嘅啫。点知到了晚上，纽约校友都转发?篇短讯过嚟，问真唔真？睇怕成个华埠都收到呢个假讯息：戴琦是戴笠之曾孙女，对中共怀有血海深仇，贸易谈判一定更棘手。

做细路时就听过先父讲戴笠之特务故事，记住呢个名字，印象中佢系蒋介石倚赖极重之共谍杀手，如果戴琦真系佢嘅曾孙女，戴琦背景非比寻常，但以中共对敌人研究之深入、之长远，戴琦于1996-1998年间在广州中山大学内之"岭南（大学）书院"教英文，中共一定老早知道佢系乜人啦！

将文字交畀肥仔K去查证，肥仔K唔知戴笠系边个，问查嚟做乜？方才省起，今天啲80后对1949年以前嘅国共内战，完全没有认识，毕竟系七十几年前之事，试问我辈在1980年识得几多1900-1910年嘅事情吖，当年知道有辛亥革命，全靠在中学读中国历史，但国共斗争史咯?，中学一直不列入课程，香港绝大部份学生，识鬼咩；但如果要教，你话今日嘅教育局会点样审批课程呢？老师又可以引用"甚么"参考书才不会被监察，被DQ呢？

卒之肥仔K在网上揾到台湾fact check网站www.tfc-taiwan.org.tw（台湾事实查核中心），该中心查证严谨，多方面核实，结论系戴琦与戴笠家族全无关系。

内地网民五毛系乱咁噏，呃海外华人，为祸甚大。讲到尾，新加坡华人永远话自己系新加坡人，唔会用普通话讲："我是中国人"，戴琦在美国出世，受美国教育，虽然能讲国语广东话，一定已经系百分百美国人，如副总统候任人贺锦丽，效忠美国宪法。但佢又未必似余茂春（蓬佩奥之国务院中国顾问）咁讨厌中共政权，虽然佢两位都系读历史，余茂春在中国长大，读南开大学，对中国嘅认识自然更真确更深入。